Samatta abakiza saa 24 tu

Samatta abakiza saa 24 tu
Dar es Salaam. Zikiwa zimebaki saa 24 kabla ya dirisha la usajili Ulaya kufungwa, mshambuliaji wa timu ya Taifa, ‘Taifa Stars’, Mbwana Samatta amevunja ukimya kuhusu hatima yake ya kucheza Ligi Kuu England.

Dirisha la usajili linafungwa leo saa sita usiku, lakini jina la nahodha huyo wa Taifa Stars, halimo katika orodha ya majina ya wachezaji wanaowindwa na klabu za Ligi Kuu England katika usajili wa majira ya kiangazi.

Samatta anayecheza klabu ya KRC Genk ya Ubelgiji msimu uliopita alifunga jumla ya mabao 32 katika mashindano yote. Nyota huyo alifunga mabao 23 ya Ligi Kuu na tisa katika michuano ya Europa.

Akizungumza jana, Samatta alisema licha ya kubaki saa chache kabla ya dirisha la kufungwa, lolote linaweza kutokea katika usajili wake wa majira ya kiangazi.

Alisema ana mkataba wa miaka mitatu na KRC Genk na atakuwa tayari kuondoka endapo klabu inayomtaka itakubaliana na viongozi wa klabu yake kwa kuwa ndoto yake ni kucheza England.

Awali, Samatta alikuwa akitakiwa na klabu za England Aston Villa, Leicester City, Watford, Middlesbrough na Burnley zilizoonyesha nia ya kumsajili. Pia Galatasaray na Lille zilihusishwa na mpango wa kumsajili.
MaoniMaoni Yako